nalilito ang abril
di alam ang gagawin
kung kukulayan ba n'ya
ang himpapawid ng asul
at magpipiyesta sa langit
kasama ang mga kerubin
o di kaya'y maglalatag ito
ng alkitran sa kalawakan
at biglang bubulabugin
ang kawan ng mga ibong
masayang nakikipagharutan
sa malamyos na ihip ng hangin
sa lupa natataranta
ang malalagong puno
ng mga magnolya.
7 abril 2005
Zurich, Switzerland
Pagpasok ng taglagas
mga sanga ng puno'y
nagsasabit ng mga dilaw,
kulay dalandan at matitingkad
na pulang banderitas;
na maya't maya'y sumasayaw
sa walang kapagurang
pagtugtog ng hangin
sa kapanahunang ito,
tila saglit na ipinagdiriwang
ang papalapit na pananahimik
ng buong paligid.
At ako'y
natulad sa mga krokus,
ang makukulay na talulot
ay noon pang tag-araw itiniklop
at sa ilalim ng lupa'y nahimbing,
tinakasan ang pagdating
ng kayhapding hangin.
Setyembre 1, 2005